Góða kveldið..

Enn og aftur er Elva á undan með blogg um það sem við gerum sameiginlegt, nú þorrablótið. Kannski ekki von, það er nú einu sinni að koma aftur helgi.

Þorrablótið var náttúrulega djöfuls snilld eins og þið hafið lesið hjá Elvu. Enda ekki við öðru að búast þegar maður loksins getur kíkt út með frúnni. Frábært kvöld og fullt af skemmtilegu fólki, t.d var ég að hitta vinnufélaga Elvu í fyrsta skipti og ekki hægt að segja annað um þá en að Elva fellur örugglega fínt inn í hópinn.

Friðrik Þór er einn fyndnasti náungi sem maður hefur hitt, og jafnframt einn sá eðlilegasti. Sennilega búinn að læra sitthvað í mannlegum samskiptum fullra sem og edrú fólks í gegnum tíðina sem leikstjóri. Þoldi ekki að tala um vinnuna sína en fannst skemmtilegra að segja sögur. Hvernig ætli það sé fyrir þetta fólk að umræðuefnið sem okkur finnst kannski spennandi en er daglegt brauð hjá t.d honum sé alltaf það sem bryddað er uppá. Ég get allavega ímyndað mér að það sé ekki alltaf gaman.

Annars eru stór tímamót um helgina hjá Gvendi þar sem hann tekur fram fótboltaskíðin eftir 13 ára hlé. Icelandair Open er um helgina og ég er með nettan hnút í malla. Svei mér þá...

Annars er þvílíkt ástand hér í Kaupmannahöfn akkúrat núna, Ungdomshuset var rýmt og vinnuglugginn hennar var aðalmyndefnið í 2 tíma löngum aukafréttatíma þar sem óeirðalögreglan sprengdi táragas fyrir utan á mótmælendur (sic!!) Mótmælendur hvers er ekki gott að segja en meira um það frá frú Elvu sem er nett sjokkeruð hérna....

Annars góða nótt og reynið nú að sofa þokkalega í nótt...

Já eitt að lokum www.bt.dk og www.ekstrabladet.dk  endilega kíkið á mótmæla fréttir og reynið að lifa ykkur inn í hvað er virkilega í gangi á götunum hérna. Það vantar eitthvað í þessa rugluðu krakka...

Góðar stundir og góðar hugsanir kl.9 að Íslenskum tíma á laugar

Lofaði færslu, stend við það og er stoltur af mér að hafa náð þessu markmiði.

Síðasta helgi var líka svona helvíti fín. Hitti Hervar, Einar Skúlason, Rásar 2 parið Óla Palla og Andreu og bræðurna Gunna og Sturra á Nýhöfn á föstudagskveldið. Fínn hópur þar á ferð. Tilefnið var að hitta Hervar og drekka öl og tókst það fullkomlega. Annars var þessi hópur hérna úti til að sjá hljómsveitina Wolfmother, www.wolfmother.com. Veit reyndar ekki hvað þeir voru að hugsa áströlsku strákarnir sem skírðu hljómsveitina og dettur manni fyrst í hug gamaldags hallærispungarokk. En það er nú öðru nær, Led Zeppilin, Deep Purple, Jimi Hendrix, Doors í bland við nýrri sveitir t.d Strokes og White Stripes eru áhrifavaldarnir og blandan er góð. Þess vegna dauðlangaði mig á þessa tónleika eftir að hafa heyrt í þeim á netinu en miðarnir voru löngu uppseldir...

Beið maður því milli vonar og ótta á laugardaginn eftir fréttum af því hvort aukamiðar væru boði. Eftir mikið naglanag var ég búinn að afskrifa þetta og var á leiðinni á bjórkvöld If Gudrunar www.ifgudrun.dk þegar Hervar hringdi kl. hálfátta (tónleikarnir byrjuðu og sagði mér að koma. Einn miði í boði...

Wolfmother stóðu undir væntingum og voru gjörsamlega frábærir. Þeir pökkuðu þessu saman bara og skora ég á fólk að leggja við hlustir þegar þeir eru spilaðir þarna heima, bara reyndar á Rás 2 held ég.

 Sunnudagurinn var svo bara þynnkulaus einhverra hluta vegna og var okkur boðið í Fastelavnsbollukaffi hjá Hjördísi og Inga. Helvíti gott bara...

Næsta helgi er svo þorrablót Ísl. félagsins í Köben. Vona að við komumst vegna veðurs! Það virðist nefnilega allt gjörsamlega fara í klessu hérna þegar það snjóar svona eins og í gær. Þetta var reyndar frekar mikill snjór en kommon ég komst í fyrsta lagi ekki í vinnuna í dag vegna strætóleysis á götunum fram eftir morgni og eftir það tók því nú ekki að mæta því það var hvort eð er enginn þarna niðri í vinnu. Og ætli þetta verði ekki sama sagan á morgun..

Annars eru helstu fréttir frá Íslandi um klámmyndaframleiðendur sem femínistar á Íslandi hafa mótmælt harðlega að fái að koma til Íslands að halda ráðstefnu.

Hvað er í gangi þarna, núna er víst búið að úthýsa þeim á hótel Sögu og maður bíður eftir að Geiri á Goldfinger reddi þeim en í alvöru talað hvað er í gangi. Það viðgengst nú annað eins á Íslandi. Mætti halda að Íslenska þjóðin væri orðin að strangtrúuðum kaþólikkum en ætli neyslubrjálæðið sé ekki farið að hafa þessi áhrif á fólk.

Man einhver annars hvar forseti Kína Li Peng gisti þegar hann kom í heimsókn til Íslands, jú hótel Sögu! Ekki sagði neinn neitt þá en Peng þessi er einn mesti kvalari og fjöldamorðingi samtímans í skjóli embættis síns. En brot hans á Tíbetsku þjóðinni og reyndar sinni eigin kemur Íslenskum femínistum, ja eða Íslendingum yfir höfuð ekkert við. En klámmyndaframleiðendur eru jú stórhættulegir glæpamenn... þetta er til skammar, finnst mér.

Eitt enn, sá frétt á Vísi í dag að félag Íslenskra stórkaupmanna hafi látið gera könnun sem sýndi að matvælaverð á Íslandi væri lægra eða sambærilegt við hin norðulöndin þmt. Danmörku. Ein spurning vaknar. Hvernig í ósköpunum eru þeir sem standa fyrir því að bera svona lygaáróður á borð ekki látnir svara fyrir þetta? Bendi á þessar síður til að svona til að sanna að þetta sé lygi.

www.bilka.dk www.netto.dk www.aldi.dk svona sem dæmi.

Hafið það svo bara sem allra best bara

Mbk. Gvendur

Nú er ég með alvarlegt samviskubit. Ennþá er fólk að læðast hérna inn, 17 manns í dag og ég hef ekki bloggað síðan í desember... þakka öllum þessum þolinmóðu lesendum og gleð þá með því að nú þurfa þeir ekki að skoða  desember færsluna í þrítugasta sinn.(Elva væntanlega þá nítugasta sinn og Heiðrún a.m.k sextugasta sinn.)

 Annars er ekkert að frétta bara....

Jú eða kannski það að allt virðist stefna í að ég sé á leið út úr húsi með bokku í rassvasanum næstu þrjár helgar, sem er met síðan ég kom til DK. Það er nefnilega hægt að telja þau skipti sem ég hef farið út (í myrkri, um helgi) á tám hægri bívunnar á mér. Það er reyndar frekar ónákvæm talning ef út í það er farið, sérstaklega fyrir óvana þar sem ekki er enn komið í ljós hversu margar tær eru í raun á hægri fætinum á mér.

Sem sagt eru það vonandi tónleikar næstu helgi, bjórkvöld til vara..

Þorrablót þarnæstu, sem ætti að verða spennandi. T.d voru diskóljósin sem notast var við á síðasta þorrablóti víst blikkljósin af löggu og sjúkrabílunum sem mættir voru á staðinn.

Og svo er það víst vonandi sigurhátíð eftir Icelandair Open fótboltamótið sem fram fer um mánaðarmótin.

Allt um þetta vonandi síðar, lofa þó engu.

Annars fór ég reyndar út að kvöldlagi um daginn og það niðrí Kristjaníu. Tilefnið voru tónleikar  snillingsins Péturs Ben.  Drengurinn er rosalegur laga og textahöfundur en ennþá betri performer og gítarleikari, djíunndjánndrinnnnng! Nýr Bubbi Mortens? Látið mig allavega vita þarna heima ef Pétur kemur í viðtal til Sirrýar. 

 Jæja ætla að fara að pósta þessu áður en þetta drasl dettur út eins og langlokan áðan. Meira fljótlega, lofa

Með Valentínusarkveðju (Eða ekki)

Gvendur lappalausi

Jæja góðann og blessaðann daginn. Krummaskuð!! Ég les stundum fréttablaðið á netinu og í einhverju blaðinu um daginn rakst ég á þessa líka furðugrein þar sem 20 "álitsgjafar" voru beðnir um að gefa sitt álit á nokkrum Íslenskum krummaskuðum þar var meðal annars sagt að Grundarfjörður sé „bara viðbjóður" og Patreksfjöður „svo dapurlegur staður að maður fær sting í hjartað", svo dæmi sé tekið af handahófi. Einnig er lagst yfir skilgreiningu á hinu íslenska krummaskuði og niðurstaðan er „fámenni, fábreytni og doði, jafnvel vondir straumar. Enginn á ferli nema nokkrir vonlausir unglingar á örstuttum rúnti eða norpandi yfir engu í niðurníddri sjoppu".
Og hvert var valið mesta krummaskuð landsins?? Nú, auðvitað ... Reyðarfjörður, sem er að breytast úr klassísku sveitaþorpi í „wannabe" stórborg.

Sem sagt "101" liðið er búið að fella sinn dóm um hina mismunandi íslensku bæi. Ok í fyrsta lagi er að greina ótrúlega heimsku og þröngsýni í þessum álitum. Hvernig veit þetta fólk hvernig í raun og veru þessir staðir eru án þess að hafa búið þar. Og ef það hefur ekki búið þar hvað í fjáranum veit þetta fólk um þessa staði og þá kemur að því. Hvernig komast svona ruglgreinar á síður blaðanna?

Er fólk plebbar eða vitleysingar bara af því að það kýs að búa á þessum stöðum. Er 101 Reykjavík svo mikið draumaland í augum þessa fólks að það sjái ekkert jákvætt við það að fólk reyni að láta sér líða vel annars staðar? Á Íslandi er fullt af skemmtilegum bæjum og þorpum sem eru iðandi af lífi. Þar sem enginn gengur atvinnulaus allir taka þátt í einhverjum félagsstörfum, ef ekki beint þá óbeint. Fólk þarf ekki að vera milljónamæringar til að búa sæmilega.

Ef við lítum yfir landið og greinum hvað hinir ýmsu staðir hafa upp á að bjóða er það fjölmargt og sem smábæjarplebbi sjálfur fullyrði ég að þegar ég var að alast upp á Stokkseyri hef ég lifað mun fjölbreyttara og innihaldsríkara lífi heldur en ég hefði átt heima í blokk við Snorrabraut, þó svo að ég sé heldur alls ekki að setja út á það í sjálfu sér.

Niðurstaða mín er því sú að 101 liðið sem virðist geta gjörsamlega stýrt hvaða umræðu sem er í þessu landi. Álitsgjafar blaðanna um allt mögulegt eru fengnir af þessu litla frímerki sem miðborg Reykjavíkur er og því hlýtur umræðan að vera skrýtin þegar svona þröngsýni og heimska veður uppi. Þetta sér maður út um allt, sérstaklega í blöðunum þar sem fátt annað er fjallað um þ.e ekki fréttatengt en það sem fer fram á þessu svæði borgarinnar.

Tja þannig var nú það í dag....

Og eitt enn. Guðrún elskulega svilkona mín spurði í kommenti á síðustu færslu sem kannski var fullalvarleg hvort það væri ekkert að gerast hérna sem ég gæti skrifað um. Jú hér er alltaf eitthvað að gerast og nóg í sjálfu sér sem ég gæti skrifað um. En það er nú einu sinni þannig að þegar maður kemst í smá fjarlægð frá einhverju sér maður það í allt öðru ljósi og það á einmitt við um ýmis málefni á Íslandi.

Mbk. Gvendur

Jæja lömbin mín. Er alltaf á leiðinni að blogga um ýmis málefni en læt þau svo bara að liggja á milli hluta. Er eiginlega í hálfgerðri tilvistarkreppu með þetta blogg, mig langar ekkert endilega að segja frá því hvað ég geri dagsdaglega, nema það sé eitthvað alveg sérstakt náttúrulega. 

Ég gæti í aksjonstíl sagt frá því hvernig strætóbílstjórinn keyrði utan í umferðarljósin í morgun, hvernig var að fara til læknis í fyrsta skipti í öðru landi og fleira. En nei, best að sleppa því bara og blogga bara um mál líðandi stundar. 

T.d. núna Írakstríðið. Framsóknarflokkurinn búinn að afsaka sig í bak og fyrir síðustu daga. Stíðið var mistök og stuðningur vanvitanna tveggja Halldórs og Davíðs var byggður á lygum. Mistök urðu sem sagt þegar stuðningsyfirlýsingin var send til Bush.

DJÖFULSINS KJAFTÆÐI!! er þetta eiginlega. Ætla allir núna að fara að fyrirgefa mönnum að hafa stutt þetta. Jájá gleymum því bara að við höfum stutt dráp á 655 þús Írökum. Vúpps þetta voru bara mistök afsakið okkur, þetta gerist aldrei aftur. Ef maður lætur sleikja sykurhúðina af þessum orðum framsóknarmanna fyrir sig þýðir þetta víst á mannamáli að þeir hafi skitið upp á bak en ætli að reyna að láta fólk gleyma þessu fyrir kosningar.

Ok. Segjum sem svo að mistök hafi verið gerð og ekkert við því að gera, ætti þá ekkert að reyna að athuga hvað varð til þess að þessi mistök urðu raunverulega og einnig að koma í veg fyrir að þau endurtaki sig. Svör við þessum spurningum væri því viðeigandi að kæmu fram..... 

1. Hversvegna var ekki haft samráð við utanríkismálnefnd alþingis?  
2. Hversvegna verða svona mistök? 
3. Hvenær varð framsóknarmönnum ljóst að um mistök var að ræða? 
4. Hversvegna var þessi ranga ákvörðun varin svo harkalega af flokksmönnum svona lengi? 
5. Voru mistökin alfarið Halldórs? 
6. Fékk Halldór slæma ráðgjöf í málinu?
7.  Lugu Bandaríkjamenn að Íslendingum? 
8. Voru flokkarnir alla tíð samstíga í mistökunum eða reyndi Framsókn að koma vitinu fyrir Sjallana? 
9. Beygði Davíð Halldór í málinu? 
10. Hvernig geta kjósendur verið vissir um að svona mistök gerist ekki aftur ef Framsókn verður áfram í stjórn? 
11. Vilja Framsóknarmenn koma því á framfæri við Bandaríkjamenn og Breta að stríðið hafi verið bull og stuðningur Íslendinga mistök?
12. Þurfa Framsóknarmenn ekki að taka málið upp á alþingi og biðjast afsökunar þar?
13. Hafa mistökin verið rædd í ríkisstjórninni?
14. Ef ekki, ætlar þá Framsókn að ræða þessi mistök í ríkisstjórninni?

Ef svör við þessum spurningum koma ekki fram á næstu dögum mun ég persónulega senda símskeyti til ríkistjórnarinnar og fá svörin og munu þau því birtast fyrst á þessarri síðu...

Vill bæta við að ég er að horfa á  Írisi í butterköpp og Magga bílnúmer í fréttunum hérna. Allavega tvífara þeirra ...

Meira síðar

Góðann dag. Það eru þvílík rólegheit hérna á Roskildevej þessa dagana. Hér gengur lífið svo sannarlega sinn vanagang og er mjög afslappað.

Það er kannski þessi tími bara. Á Íslandi fannst mér þessi tími, þ.e okt-nóv og kannski des vera svona hálfgerður biðtími. Veðrið yfirleitt vont, myrkrið skollið á, prófin nálgast (eða enginn veiði og bið eftir vertíð á sjónum), jólastress á leiðinni osfrv. osfrv.

Hérna líður manni öðruvísi. Svo þegar maður hugsar tilbaka um þessa mánuði síðustu ár, þá man maður eiginlega ekkert eftir þeim og því verða þeir eiginlega að teljast til leiðinlegustu mánaða ársins svona þannig séð, ef maður lítur á það þannig að einhverjir tímar séu leiðinlegir.

Annað sem ég held að sé að gera Íslendinga brjálaða á köflum er tímaleysi fyrir hluti sem það vildi hafa meiri tíma fyrir, t.d fjölskyldu,áhugamál, svefn og margt fleira. Ég byggi þetta á því að ég vann fyrstu tvo yfirvinnutímana mína í gær síðan ég kom hérna út. Ég er svosem vanur því að vinna yfirvinnu, eiginlega er undantekning ef það hefur ekki verið unnin yfirvinna í þeim störfum sem ég hef verið í. En sem sagt í gær þurftu nokkrir að vera lengur eða ca. tveimur tímum lengur og mórallinn og skapið í mönnum tók dramatískum breytingum og leið og yfirvinnan hófst.

Menn urðu fúlir,stressaðir og hreinlega latir. Samt voru þetta bara tveir tímar eða til kl. 4. Einn hafði það meira að segja á orði að nú yrði sko að fara að skipta um vinnu ef þetta væri það sem koma skyldi.

Engin pólitík núna en eitt finnst mér þó alveg furðulegt og tengist krónísku minnisleysi Íslendinga gagnvart stjórnmálamönnum og þvi sem þeir hafa gert eða ekki gert.

Árni Johnsen fékk flest atkvæði í prófkjöri Sjálfstæðisflokksins á Suðurlandi og gæti vel orðið ráðherraefni ef Sjálfstæðisflokkurinn vinnur jafn stórt og allt virðist benda til.

Man enginn eftir því að Árni er nýsloppin út úr fangelsi fyrir þjófnað! Eða finnst fólki bara allt í lagi að láta ræna sig. Hvernig í fjandanum getur fólk treyst þessum manni fyrir nokkrum hlut eftir þetta, sérstaklega algjört iðrunarleysi sem hann sýndi bæði fyrir prófkjör og núna eftir prófkjör þar sem hann bar fyrir sig að þjófnaðurinn hefði verið "tæknileg mistök". Sem sagt það voru tæknileg atriði sem urðu til þess að hann náði ekki að komast upp með þetta, enda var hann dæmdur í fangelsi sem ekki er algengt með þjófnaði nema þeir séu stórfelldir og alvarlegir.

Sem sagt Árni Johnsen framdi ekki glæp, þetta voru bara tæknileg mistök sem urðu til þess að heilu brettin af gangstéttarhellum voru lagðar í kringum húsið hans af honum sjálfum. Sjálfstæðisfólk á Suðurlandi hlýtur að vera alvarlega heilaþvegið fyrst það kaus þennan mann.

Mbk. Gvendur

... hápólitísk færsla er það ekki núna. Annars er pólitík og þjóðfélagsmál eitt það allra skemmtilegasta sem ég pæli í. Fólk hugsar hreinlega alltof lítið um pólitík og hvernig málum okkar er háttað.

Langflestir segjast einfaldlega ekki hafa áhuga á pólitík, nenna ekki að tala um hana og finnst umræðan leiðinleg. Ég skil þetta fólk að mörgu leyti en þó ekki öllu...

Fólk sem engan áhuga hefur á pólitík ræðir þó pólitík oft á dag. Kannski án þess að átta sig á því. Skólamál, matvöruverð, umhverfið okkar, peningamál og í raun flest öll þau mál sem við ræðum daglega eru í raun og veru hápólitísk.

 Þannig liggur þetta víst og því finnst mér í raun sorglegt að við myndum okkur ekki sterkari skoðanir á málunum og gagnrýnum ekki stjórnmálamenn meira og sínum þeim meira aðhald, verum róttækari. Ef við værum róttækari og kysum eftir okkar sannfæringu þá væri meira krefjandi fyrir stjórnmálamenn að vinna og að mínu viti kæmi meira út úr verkum þeirra.

Núna hugsa kannski einhverjir sem lesa að breyting á hugsunarhætti eins einstaklings skipti engu máli og er það líklega ástæðan fyrir því að margir hafa engan áhuga á stjórnmálum, finnast þeir ekki geta haft nein áhrif. En hvernig væri lífið í samfélaginu ef að allir kysu virkilega eftir sinni sannfæringu. T.d gerðu lista yfir það sem þarfnaðist breytinga og kysu svo eftir því.

Samfélagið yrði heilbrigðara það get ég sagt ykkur....

Vandamálið er líklega lygaflaumur kosningaloforðanna. Hugsið ykkur samt ef stjórnmálamönnum væri refsað ef kosningaloforð yrðu ekki efnd.

Nú jæja þetta varð víst að hápólitískri færslu, en eru ekki flestar færslur pólitískar. Ætla að blogga aðeins meira um pólitík á næstunni....

Áfram með pólitík og pælingar. Ég hef verið svolítið að spá í sköttum, þjónustu ríkisins og fleiru. Niðurstaða mín er í stuttu máli: Ríkið fer illa með peninga.

Núna mætti halda að Gvendur ætlaði að fara mæla fyrir óskoraðri einstaklingshyggju eða svipuðu en svo er nú ekki. Málið er nefnilega að málstaður einstaklingshyggjumanna er nefnilega ávallt á þann veg að ríkið er ekki besti aðilinn til þess að veita þjónustu fyrir almenning og því þurfi að breyta. Lækka eigi skatta og leyfa einstaklingunum að velja hvað verður um peninga sína.Þessir sem háværastir á þessum nótum eru oft kenndir við Sjálfstæðisflokkinn og ákalla þeir "frelsið" einstaklingsins af öllum mætti. Þetta má t.d sjá í kosningabaráttu fyrir prófkjör þeirra.

Málið er nefnilega að ríkið fer illa með skattpeninga okkar og gera stjórnmálamenn sér oft ekki grein fyrir að þeir vinna í umboði skattgreiðenda og ættu þeir því að hugsa meira um það. En dæmi um bruðl á skattpeningingum eru;

Tónlistarhús

Hátæknisjúkrahús

Styrkir til landbúnaðs

Sendiráð

...og margur fleiri óþarfi.

Áköllun á frelsi af Sjálfstæðismönnum á því að mörgu leyti rétt á sér nema hvað að þeir hafa í stjórn náð að þenja út ríkisbáknið og hækka skatta svo mikið að aldrei hefur ríkið haft eins mikla peninga til ráðstöfunar. Þeir sem eru búnir að gleyma hvaðan ríkið fær sína peninga er það frá þér og mér, hinum vinnandi manni. Látið því ekki kjaftavaðal og lygar um skattalækkanir úr munnum stjórnmálamanna ekki glepja ykkur. Stjórnmálamenn á Íslandi kunna ekki að lækka skatta, aðeins að færa þá til.

Þeir kóngar sem ákalla s.k frelsi sem mest hafa með grettistaki náð því að hækka skatta á Íslandi en minnka um leið þjónustu. T.d greiðum við meira fyrir lyf og lækna nú en áður. Tannlæknaþjónusta barna er rándýr, framlög til menntamála hafa hlutfallslega minnkað m.v. fjölda nemenda og svona mætti lengi telja en samt hækka skatta, frelsisunnandi Sjálfstæðismenn er því kannski ekki alveg að segja satt í prófkjörsauglýsingum sínum. Þeir vilja bara hækka á okkur skatta en ekki til að bæta þjónustuna heldur í ýmis verkefni eins og minnst var á að ofan. Því ætla ég að koma með smá skilgreiningu á frelsi sem vel væri hægt að brúka:

Frelsi er hægt að skilgreina á margan hátt. Þó svo einstaklingshyggjumenn reyni að tryggja sér einkarétt á því hugtaki me ð sínum skoðunum um að draga eigi úr grunnþjónustu ríkisins og leyfa viðskiptalífinu að ávaxta peninga sína þar í staðinn.

Ríkið fer á margan hátt mjög illa með skattpeninga okkar. Það er lítið aðhald á mörgum sviðum og forgangsröðun stjórnvalda er oft vægast sagt furðuleg. Ríkisrekstur er á mörgum sviðum algjörlega ónauðsynlegur og ósanngjarn og ríkið mætti draga sig út á mörgum sviðum eins og bent hefur verið á. EN aðeins á þeim stöðum sem að hagsmunum heildarinnar þ.e. þjóðarinnar verður ekki stefnt í hættu.

Aftur að frelsinu. Ég ég er vinnandi maður og borga mína skatta og skyldur eins og flestir í þjóðfélaginu. Ég get farið til læknis án þess að þurfa hugsa meira um það. Ég fer bara og borga smáupphæð til að fá að tala við lækninn og nb. læknirinn er virkilega góður, á heimsmælikvarða og ég er sáttur. Ég get treyst honum fyrir því að lækna mig og fjölskyldu mína og ég get jafnvel farið og lagst inn á sjúkrahús hvort sem að ég eigi tíkall eða tíu milljónir í vasanum. Þegar ég er búinn að fá bót meina minna að þá get ég farið heim til mín og gert það sem ég vil. Ég held áfram að vinna og borga mína skatta. Þetta kalla ég frelsi.

Meira um frelsið. Ég er orðinn leiður á vinnunni minni. Mig langar til að ná lengra og ákveð að mennta mig. Ég er fjölskyldumaður sem að hef borgað mína skatta til samfélagsins. Ég hef ekki haft ráð á því að spara mikið af peningum, en ég ákveð samt að fara í skóla með von um að ég geti haft það betra að námi loknu. Ég lýk námi og á eftir fæ ég betri vinnu en ég hefði nokkurn tíma getað fengið ómenntaður. Ég fæ hærri laun og borga meira til samfélagsins en áður. En ég er sáttur. Ég hef lokið námi, n.b á heimsmælikvarða þótt að ég hefði ekki átt stórar fjárhæðir í vasanum. Að námi loknu skila ég meiru til samfélagsins en áður, ég er hagkvæmari. Og held áfram að borga til samfélagsins þannig að börnin mín geti haft sömu tækifæri og ég hef. Þetta kalla ég frelsi.

Smá niðurlag. Ríkið á að veita grunnþjónustu sem stuðlar að bættum þjóðarhag. Það er staðreynd að gott heilsufar og góð menntun landsmanna er mörgum sinnum meira virði en þær upphæðir sem að við veitum í heilbrigðis og menntamál. Og á meðan allir hafa sama rétt til þessarrar þjónustu að þá eru allir þegnar þjóðfélagsins frjálsir en ekki bara þeir sem að eiga peninga. 

Meira síðar......

2700

655000

Hvað segja þessar tölur okkur og hvað tákna þær eiginlega? Í fyrsta lagi þá er 2700 ca. talan á þeim sem fórust í árásunum 11.sept. 2001. Ef talan 2700 er táknuð sem orsök þá er talan 655000 tákn um afleiðingu. 655000 er fjöldi þeirra sem hafa látist í Írak umfram hið venjulega á þeim þremur árum sem liðin eru síðan innrásin þar var gerð.

Árásin 9/11 verður sennilega álitin eitt mesta voðaverk sem unnið hefur verið þegar fram líður. Árásin sjálf er þó umhugsunarefni og samsæriskenningar um atburðina fá sífellt meiri vigt og t.d hafa eru 40 % Bandarísku þjóðarinnar á því að opinberu skýringarnar á atburðunum standist ekki sem þýðir að 130 milljónir Bandaríkjamanna telji að George Bush og lýðurinn í kringum hann sé að ljúga um hvað raunverulega gerðist þennan dag. Hvet fólk til að kynna sér síður um samsæriskenningarnar, auðvelt að finna á google.

Eftir þessa atburði fór af stað atburðarás sem í dag er í sjálfu sér stórfurðuleg. Bandaríkjamenn sögðu hryðjuverkum stríð á hendur! Tóku sér sjálfsvald meðal þjóða heimsins og byrjuðu að skipuleggja innrásir inn í Afganistan, með það fyrir augum að drepa niður hryðjuverkastarfsemi og siða þjóðina með Guðs vilja eins og Bush sjálfur orðaði það. Sem sagt hryðjuverkin voru allt í einu gleymd en nýtt stríð byggt á trúarbrögðum og árásir á menningu voru hafnar.

Nú var ekki aftur snúið, einræðisherranum Saddam Hussein skyldi steypt af stóli, með Guðs vilja að sjálfsögðu. Undirátyllan var sú að hann væri að undirbúa smíði kjarnavopna sem hann myndi síðan reyna að skjóta til USA. Reyndu Bush og hans félagar að telja þjóðum heims trú um þetta, þar á meðal Íslendingum og fór svo að áður en ástæður innrásar í Írak voru komnar endanlega í ljós höfðu tveir Íslenskir einræðisherrar, þeir Davíð Oddson og ´Halldór Ásgrímsson lýst yfir stuðningi og heitið aðstoð við innrás í Írak fyrir hönd Íslensku þjóðarinnar.

Með þessum stuðningi og annarra trúgjarnra þjóða einnig hófst svo ólöglegt stríð í Írak því ástæðan kjarnavopn var lygi frá upphafi til enda og fundust aldrei nein kjarnavopn né vísir af öðru sem gæti ógnað heimsbyggðinni. Eins og allir vita var því stríð gegn hryðjuverkum orðið að engu en innrás í auðugt olíuland sem að auki iðkar vitlausa trú orðið staðreynd.

Íslensku strengjabrúðurnar töldu öllum Íslendingum trú um lengi vel að innrásin væri byggð á réttum forsendum og lugu sig í gegnum einar kosningar með þeim rökum. Frægur er sinnepsgassfundur Íslensku sprengjusérfræðinganna sem skv. Halldóri Ásgrímssyni var endanleg sönnun að Írakar ættu gereyðingavopn. Reyndust þessar bombur svo vera fýlubombur notaðar til æfinga. Orð Davíðs um sama málefni voru þau að ástandið væri gott í 800 af 807 bæjum í Írak eða eitthvað svoleiðis. Á þeim tíma sem þessi orð voru sögð var innrásarherinn með stuðningi Íslendinga að drepa 25 Íraka á klukkustund.

Í dag er staðan því sú að þessi herför USA með stuðningi Íslendinga hefur kostað 655000 manns lífið. Ólöglegt stríð byggt á lygi og viðbjóðslegu innræti valdamikilla manna. EF við yfirfærum þessa tölu yfir á Ísland væru 7500 manns látnir og sér maður því hversu miklar hörmungar hafa átt sér stað þarna.

Viðbrögð ráðamanna Íslenskra og erlendra eru svo hræðileg. Bush segir töluna vera ómerkilega ágiskun enda ekki við öðru að búast af honum. Íslenskir ráðamenn þegja! Það eru að koma kosningar og þeir mega ekki við því að viðurkenna mistök sem þessi núna. Samt sem áður breytir það því ekki að þeir menn sem núna sitja við stjórn drógu Íslendinga sem þáttakendur í eitt hörmulegast stríð sem háð hefur verið. Afsökunarbeiðni til Írösku þjóðarinnar eða hvað þá Íslensku þjóðarinnar mun aldrei koma til enda er hæpið að afsökunarbeiðni dugi til þegar um svo mörg mannslíf er að ræða..

Afleiðingar 9/11 og stríðs gegn hryðjuverkum eru því þessar..

Mörg hundruð þúsund saklausir borgarar látnir án ástæðu...

Aldrei fleiri hryðjuverk framin...

Hryðjuverkaógn er nú um allan heim sem ekki var áður.

Þessu hafa m.a. Íslendingar staðið fyrir, já eða ráðamenn Sjálfstæðis og Framsóknarflokks. Á þetta fólk ekki að svara fyrir gerðir sínar?

Ja hérna hér... Klukkan hér er 1.27 að staðartíma og ég þarf endilega að koma að einni lille smule færslu.

Í fyrsta lagi þá svaf ég eins og engill hér fyrir framan sjónvarpið en hrökk upp við hljóð sem ekki er vant að heyrast á þessum tíma dags (já eða nætur). Bréfalúguna!! Ok ég vissi að Danir væru skrýtnir og svona ligeglad en að bera út póstinn klukkan hálf tvö er ofar mínum skilningi, í grenjandi rigningu í þokkabót. Póstmaðurinn hefur kannski sopið of marga í dag, sofnað og verið svo að drattast á fætur núna..

Í öðru lagi þá kom konan heim. Hún var nú bara hress þegar hún kom inn og byrjaði að segja mér hvað hún hafi verið að gera í kveld. Það sem er nýtt við það var að frásögn kveldsins var á dönsku í þetta skiptið... og hún er bara helvíti klár þó Danir skilji hana kannski ekki  þá skil ég allavega mjög vel dönskuna hennar.

Sem sagt þetta voru tilefni þessarrar bloggfærslu. Danskir bréfberar og fyrstu setningar frúarinnar...

Núna um daginn fór ég út í búð til að kaupa í matinn. Ég keypti svona þetta venjulega, mjólk, brauð og eitthvað og svo kom að stóra höfuðverknum. Hvað á eiginlega að hafa í matinn? Einhverjar hugmyndir voru uppi um hamborgara. Ég gekk framhjá frystiborðinu og hreinlega fann bara ekkert. Gekk svo að ferska ketinu og því dóti og fór að kíkja á. "Hmmm, ferskar kjúklingabringur". "Æææ alltof dýrt að skella þeim á hammarabrauð hugsaði ég með mér" Kíkti svo á verðið og hvað haldiði. Heeeh kjúllabringurnar voru ódýrari en hammarahakkið við hliðina. Ég næstum steinligg í gólfinu á Nettó yfir þessari sýn.

Sem sagt ég náði þó að drösla 1800 grömmum af fyrsta flokks kjúklingabringum upp í körfuna og á leiðinni á kassann greip ég með pakka af hamborgarabrauðum. Það voru því alvöru kjúklingaborgarar á Roskildevej 266 þennan daginn. Þessi 1800 grömm af hreinum og beinlausum kjúllabringum kostuðu mig 59 dkr. sem er á gengi dagsins í kringum 650 kr. íslenskar og duga þær vel í 2-3 máltíðir.

Ástæðan fyrir því að ég pikka niður þessa smásögu úr ofurraunveruleikanum er sú að á Íslandi hefði ég hreinlega verið talinn stórskrýtinn ef kjúklingabringur og hamborgarabrauð hefðu verið keypt saman. Kjúklingabringur á Íslandi kosta nefnilega 2000 - 2500 kall kílóið og hefði ég því líklega þurfta að borga á fjórða þúsund fyrir þetta heima eða ca. 2 heilar innkaupaferðir hér í Rödovre.

Spurningin er því sú. Af hverju kostar rúmlega 3 sinnum meira að rækta kjúklinga á Íslandi en í Danmörku. Þessi spurning er nefnilega ótrúlega spennandi. Borða t.d Íslenskar hænur meira en þær Dönsku og þá afhverju? Ég held reyndar að þetta sé ein birtingarmynd okkar Íslendinga. Við borgum bara uppsett verð og okkur virðist hreinlega vera sama, bara að við fáum að borða... Hérna myndi enginn kaupa vöru ef hún væri ekki verðlögð í samkeppni við aðrar vörur en á Íslandi höldum við bara áfram að kaupa kjúllabringur þó svo þær séu ca. helmingi of dýrar.

Þetta var nú bara svona lítið neytendahorn.

Og eitt svona í lokin þá kostar beinlaus rúlla af hamborgarhrygg innan við 50 krónur danskar á kílóið eða 6 sinnum minna en á Íslandi sem hlýtur að vera eðlilegt er það ekki...?

Hei, hér er sól og hiti, dagurinn í dag var svona svitabrækjudagur með tilheyrandi lykt Dagurinn á morgun verður eins held ég.

Maður heyrir að á Íslandi sé allt að fara í gang í pólitíkinni fyrir næstu kosningar. Svona eins og þetta fer af stað má ég hreinlega til með að segja ykkur bara hvernig þetta fer svo þið þurfið nú ekkert að ómaka ykkur við að kjósa. Sjallar 41%   Frammarar 10% Samfó 27% og restin skiptir hinu eins og áður. Þarf víst ekki að taka fram að D og B verða saman í liði eftir kosningar með tilheyrandi fnyk af leiðindum ef svo má að orði komast..

En hvað um það þetta verður ekkert spennó og munið þessa bloggfærslu því vel. Tilefnið var nefnilega ansi ómerkilegur pistill sem birtist í Fréttablaðinu eftir rauðhærðan stuttbuxnadreng úr Sjálfstæðisflokki þar sem hann taldi sig fara með gamanmál um eigin aumingjaskap þegar hann steig á sjó í fyrsta sinn. Ég á nú sjálfsagt eftir að blogga meira um þessa smeðjulegu kandidata sem reyna að ljúga til sín atkvæði okkar en mig langar til að byrja á þessum ágæta stuttbuxnafrelsispostula.

Pistillinn fjallaði um hann sjálfan og sín sjómennskuævintýr sem áttu væntanlega að reyna að vera fyndin og hitta í mark en gerðu ekki. Sjóveikin plagaði hann svo mjög að hann reyndi með veikum mætti að lýsa þeirri reynslu á skemmtilegan hátt en tókst ekki. Endaði svo greinina á því að biðja um stuðning sjómanna með þessum orðum:

"Ég er þó þeirri reynslu ríkari að sjómenn, þrátt fyrir hrjúft yfirborð, eru góðir vinir í raun og ég vona að ég njóti stuðnings sjómanna hér í Reykjavík, þrátt fyrir fremur stuttan sjómennskuferill."

Sem sagt gamall ónytjungur að vestan sem gat ekkert en gerir lítið úr sjálfum sér 30 árum síðar. Ekki merkilegur pappír.

Nú er sjálfsagt einhver að hugsa. Af hverju í fjáranum fer þessi maður og þessi pistill svona í taugarnar á Gvendi? Jú svarið það að ég hef nefnilega ágætisminni þegar kemur að svona vitleysingum og ég man það þegar hann háði snarpa orustu við einhvern viðmælanda í sínum eigin spjallþætti á Skjá einum um sjómannaafsláttinn. Þetta var fyrir ca. 2 árum síðan og endaðu þessi kappræðuhöld þannig að þessi  rauðhærði maður sem um ræðir taldi sig hafa hrósað sigri yfir viðmælandanum með orðum sem voru eitthvað á þessa leið:

Af hverju eiga sjómenn að njóta aukaskattafsláttar á við annað vinnandi fólk, ætti þá ekki bara allir sem geta sýnt fram á skertan tíma með fjölskyldu vegna vinnu að eiga rétt á því sama?

Ég nefnilega man það að ég var svo hissa yfir þessum orðum og stimplaði þennan mann sem rugludall. Nú var ég bara búinn að gleyma honum þangað til ég sá þessa grein og birtist þá rauðhærði stuttbuxnadrengurinn eins og uppvakningur með sama bullið og áður.

Sem sagt týpískur Íslenskur stjórnmálamaður...

Önnur færslan frá Roskildevej 266! Hér gengur lífið sinn vanagang, helsta í fréttum svosem er að hjónaleysin á Roskildevej eru frelsuð...

Nú halda einhverjir að við séum rugluð, heilaþvegin af dönskum sértrúarsöfnuði, hætt að drekka eða þaðan af verra en nei við erum frelsuð frá ólæknandi (eða það hélt ég) sjónvarpsfíkn.

Heima á Íslandi fékk sjónvarpsgarmurinn aldeilis að finna fyrir því, kveikt á kl 07.00 og slökkt kl.01.00. Hér hefur Sanyoinn hinsvegar fengið frí mest allan þann tíma sem hann hefur verið hér. Lætur það þurrka af sér öðru hvoru og hefur það náðugt.

Heima lét maður Bandarískar sápur og léttmeti blekkja undirmeðvitundina og maður hélt að maður væri aldeilis að missa af öllu sem máli skipti, í lífinu þá.. Undirmeðvitundin er hinsvegar gáfaðri en maður sjálfur á endanum. Um leið og ljóst var að ekkert sjónvarpsgláp yrði á Roskildevej fór hún að segja manni að sjónvarpið væri alls ekki nauðsynlegt fyrir fyllingu í heilabúið og lét hún okkur því slökkva á Sanyonum fyrir fullt og allt eða svona næstum því.

Ég er allavega glaður á meðan það endist, hér er farið snemma að sofa, jú undirritaður vaknar ávallt kl. 05.06 og ekki mínútu fyrr og verður því að fara að sofa allavega fyrir kl.00.00. Í staðinn fyrir sjónvarpsglápið hefur húsfrúin tekið sér það fyrir hendur að lesa hinar ýmsu perlur heimsbókmenntana s.s. Paradís eftir Lísu Marklund og svo gluggar hún öðru hvoru í bæklingana sem Dönsku verslanirnar eru svo góðar að senda og inn um lúguna í tonnatali.

Ég sjálfur les nú bara hina sígildu bók Frumkvæði til framfara eftir Eyþór Ívar Jónsson og Winning with new products sem einnig er að verða sígild vegna þess að ég næ bara ekki að klára hana alveg.

Ýmsir molar um danskann kúltúr verða að bíða enn um sinn. Hef eiginlega svo mikið að gera að ég ætti nú eiginlega ekki að vera að blogga hérna. Er t.d. að ljúga saman eitt stykki Curriculum vitae enda þyrstir mig í að byrja að vinna með hausnum en ekki upphandleggsvöðvunum sem reyndar eru orðnir svipaðir í ummál og lærin á mér sem er nú nokkuð gott...

En nóg um þetta í bili, ætla að leyfa ykkur að melta þessar fréttir áður en nýjar berast....

Hæ, fyrsta færslan frá Roskildevej. Hef ekkert bloggað vegna þess að Elva hefur alltaf verið fyrr til að segja það sem segja þarf. (Alltaf gott að hafa einhverjar afsakanir). En allavega eins og þið vitið líður okkur öllum ágætlega í augnablikinu og erum búin að setja upp skype og það hafa verið fullt af gestum hjá okkur. Þannig hefur það nú verið bara..

Hef fílað mig voða mikið sem útlending og jafnvel túrista hér í Danmörku það sem af er. Útlendingur er ég vissulega upp að vissu marki þó svo einhver tenging eigi að vera á milli landanna þá er ekki beint augljóst hver sú tenging eigi að vera. Saga Danmerkur og Íslands er að mörgu leyti samtvinnuð á síðustu 2000 árum en hvorugar þjóðirnar vilja ekki beint viðurkenna einhvern frændskap. Held t.d að ég muni aldrei heyra sagt hér í DK, "frændur okkar Íslendingar" eins og maður hefur stundum heyrt sagt á Íslandi, sérstaklega þó af íþróttafréttamönnum sem fara að halda með Danmörku þegar enginn Íslendingur er eftir í keppni.

Þó svo að það sé þegjandi tenging á milli Íslands og DK hefur maður tekið eftir að margt er líkt með ýmsu í þessum tveimur löndum. Var reyndar búinn að hugsa mikið um þetta hérna um daginn og hefði betur bloggað um það þá en ég er víst veikur núna og það virkar á mig eins og þynnka, ég verð heimskur og man ekki neitt. Þannig að ég mun vonandi, ef ég nenni eitthvað að blogga það er að segja reyna að finna það sem sérstaklega Íslendingar hafa apað upp eftir Dönum og þið sem munið eftir einhverju megið endilega henda því í komment. Það var allavega af nógu af taka þarna um daginn þegar ég var að hugsa um þetta.

Annars er þetta bara ljúft líf að vera hérna, maður fyllist svona nýjum krafti einhvern veginn því þetta er vissulega áskorun að flytja til annars lands og því er svo margt nýtt sem maður þarf að tileinka sér, læra og gera og það er held ég málið hjá okkur flestum að við virkum best í þannig kringumstæðum. Þ.e. nýjar áskoranir á hverjum degi draga fram góða hluti hjá manni.

Allavega gott að vera búinn að blogga og vona að maður verði eitthvað duglegri við þetta....